!اقــــوال وافعـــال تخــــالف العقــيده ،،ربـما نقــع فيهـــا /هـــااااام!

بسم الله الرحمن الرحيم
والحمد لله رب العلمين والصلاة والسلام على سيد الاولين والاخرين محمد وعلى اله وصحبة اجمعين وبعد --
اخوانى \\ اخواتى حيااكم الله جميعاااا
النهاردة هنتكلم عن موضوع خطيرر جداا بتقع فية كثير من الناس فى الايام دى - الموضوع هيكون بعنوان اقـــــــــوال تخـــالف العقيـــــدة فى
ناس كثير يا اخواتى بتقول كلام غلط وخاطى ويمكن متاخدش لبالها منه او
متفهمش معنى الكلام الى بتقوله والكلام دة ممكن يوقعها فى شرك !شرك ؟؟ انتى
بتقولى ايه ؟ اه بقول شرك ما انا قلت ان الموضوع خطيرر جداا علشان كدة
لازم نركز وننتبة كويس فى كل كلامنا الى بنقوله *
طيب تعالوا كدة نشوف امثله من الكلام الخطا الى بتقع فية كثير من الناس وترددة وخلاص كمان مش تفهم معناه !
اول حاجة ---تلاقى ناس كثير لما تيجى تحلف تقول ايه * والنبى يا فلان اعملى
كذا --او والكعبة -- او ومقام النبى الغالى عندك - او وتربة امك -- او
ورحمة ابوك -- او والنعمة --او وحياتى عندك -- او والعيش والملح الى بينا
--فى ناس كثير بتحلف بكدة ولا لا ؟؟ ايوة والله فى كثير بيحلف بالحجات دى -
دة اية دة برضو ؟ ينفع الكلام دة برضو ؟ لا مينفعشى -
عارفين يا اخواتى كل الامثله دى والله الى قلتها عن الحلفان الى يحلف بيها يبقى وقع فى الشرك اة شرك بس شرك اصغر لا يخرج من الدين
طيب اية دليلك على كلامك ان الى بيقول والنبى او والنعمة او والكعبة يبقى
وقع فى الشرك اصلو انتى بتقولى كلام خطيرر جداا ولازم ناخد دليل علشان
نقتنع ونصدقك !طيب اتفضل الدليل اهو مع حضرتك -- قال النبى صلى الله علية
وسلم "من حلف بغير الله فقد اشـــــــــرك --خد حديث تانى "من كان حالفا
فليحلف بالله " وكمان يا اخواتى برضو فى ناس تقول بامانه -امانه ايه بس
انتا هتعمل زى النصارى لما يجوا يحلفوا ولا ايه ؟؟
عارف انتا اول ما تحلف وتقول بامانه يبقى انتا كدة مش من المسلمين !
ايه يا اخت انتى انتى هتطلعى الناس من الاسلام على مزاجك ولا اية ؟؟ لالا مش انا الى بقول كدة
انتا بتصدق النبى ولا لا ؟ اة ايوه اسمعك بتقول طبعا بصدقة !جميل الكلام
طالما حضرتك تصدق النبى يبئا اعرف ان النبى قال فى حديث له "من حلف
بالامانه فليس منا "يعنى مش من المسلمين !
مينفعشى يا اخواتى نحلف بالحجات دى يبئا منقولش تانى والنبى اعملى كذا او
هاتى كذا -- ولا وحياتى عندك -- ولا والنعمة --ولا بالكعبة -ولا ورحمة ابوك
لالا اوعوا تقولوا كدة تانى وتحلفوا بالحجات دى انتوا احلفوا بالله بس
قولوا والله -- او ورب الكعبه بـــــــس
طيب ما احنا كنا بنقول قبل كدة والنبى -والنعمه والكعبة والحجات دى يبقى
احنا كدة وقعنا فى الشررك ومشركين يعنى ؟؟ نعمل ايه طيب ؟؟ بصوا يا اخواتى
انتوا الى هتعملوه بسيط جداا مش صعب ولا حاجه انتوا هتقولوا بس لا
الـــــــه الا اللــــــــه محمـــــــــد رســـــــول اللــــــــه !
يعنى لو غلط بعد كدة مرة غصب عنك ونسيت وقلت والنبى -- والنعمة -- والكعبه
قول على طول لا اله الا الله محمد رسول الله وبكدة يبقى انتا كفرت عن
الحلفان الى حلفتة طيب تعالوا نشوف حاجة تانية :فى ناس كثير تقول سايق عليك النبى تمشيلى الموضوع ده -- سايق عليك ربنا انك تكونى معايا فى كذاا
عارفين يا اخواتى والله دة مصيبه كبيره انك تقول سايق عليك ربنا عارف ليه ؟
لانك كده انتا جعلت ربنا كانه انتا بتسوقه ان ربنا مساق وكانه عاجز ده
والله سوء ادب --ايوه احنا كنا بنقول ده ومش واخدين لبالنا خالص ومش قصدنا
بس يا ريت ننتبه بعد كده -- طيب امال اقول ايه لو كنت عاوز حاجة من حد ؟؟
انتا تقول بالله عليك تعملى كذاا- اقسمت عليك بالله تيجى معايا مشوارى -
تحلف بكدة يعنى بالله عليك متقولشى تانى سايق عليك ربنا خد بالك بعد كده ! نشوف
حاجة ثالثه كمان : برضو فى ناس تقول ساعتمد على الله وعليك -- او هسيب
الموضوع دة عليك -- او ما شاء الله وما شئت -- عارفين يا اخواتى هذا شرك
والله !
يعنى اول ما تقول ساعتمد على الله وعليك تبقى دى كلمة شرك لانك بكدة ساويت
فلان بربنا ساويت المخلوق بالخالق بكلمة وعليك دى وكمان كلمه وما شئت حرام
-- تاخد الدليل ؟؟
قال النبى لما قال له رجل ما شاء الله وما شئت قال النبى :اجعلتنى لله لدا ؟
قل ما شاء الله ثم ما شئت وفى روايه تانى قل ما شا ء الله وحده يعنى شخص
قال للنبى الى رايدة ربنا والى رايده انت فراح النبى للرجل اجعلتنى شريكا
لله بقولك وما شئت ؟؟ قول ما شاء الله ثم ما شئت او قول ما شاء الله وحده
!يعنى اوعى تقول تانى ساعتمد على الله وعليك او ما شاء الله وما شئت طيب
امال اقول ايه طيب ؟انتا قول ساعتمد على الله ثم عليك طيب ايه القرق بينها
وبين ساعتمد على الله وعليك ما هى هى ؟؟ لا فى فرق !طيب ايه هو ؟ الفرق هو
ثم تقول ثم عليك مش وعليك علشان اول ما تقول وعليك يبقى ساويت المخلوق يبقى
-- يبقى الكلام الصح هو ساعتمد على الله ثم عليك -- او ما شاء الله ثم ما
شئت تعالوا
نشوف حاجة رابعة : فى ناس مثلا تقول حج فلان راح فين بقالى اسبوع مشفتهوش
فواحد يرد عليه ويقوله ده ربنا افتكره ومات !ايه ده هو ربنا بينسى ؟؟ حرام
كلمه دة ربنا افتكره دى ربنا قال فى القراءن وما كان ربك نسيا
وبرضو كمان حد يروح يزور مريض فيقوله اصبر شويه يا اخى ده افتكار ربنا رحمه
! ده برضو كلمه تنفع تنقال -- يال بنى هو من امتى ربنا نسيه علشان يفتكره ؟
سبحان الله فالكلمه دى يا اخواتى اوعى تقولها او تقوليها تانى --تعالوا نشوف حاجه خامسة : مثلا لو حد مات وواحد راح يعزيه فيقوله ايه -- البقية فى حياتك فيرد عليه ويقوله فى حياتك الباقيه
كلمه البقية فى حياتك دى حررررام ! ايه دة يا اخت ما احنا طول عمرنا لما
نيجى نعزى حد بنقوله البقية فى حياتك ايه المشكله يعنى ؟بصوا يا اخواتى
انتا اول ما تيجى تقول البقية فى حياتك كانك انتا تعتقد ان فلان الى مات
مات ناقص عمر فانتا بتقول لصاحبك الى بتعزيه بقيه عمره تاخدها انتا وتضاف
لحياتك انتا فانتا تروح تقول البقية فى حياتك
طيب امال ما نيجى نعزى منقولش حاجة خالص ؟؟ لا حضرتك تقول البقاء لله اهو كلمتين سهلتين ومش مخالفين فتقول البقاء لله طيب
تعالوا نشوف حاجة خامسه : مثلا تلاقى واحد بيقول ده فلان دة مبيرحمش ولا
بيسيب رحمه ربنا تنزل ! الكلام دة غلط مين ده الى يقف فى وجه اراده الله
وميخليش رحمته تنزل ؟
مين ده كمان المتجبر ؟ ربنا قال فى القراءن ما يفتح الله من رحمه فلا ممسك لها وما يمسك فلا مرسل له من بعده وهو العزيز الحكيم --
ربنا قال انما امره اذا ارد شيئا ان يقول له كن فيكون لا راد لقضائه يبقى
يجى فلان المتكبر المتجبر دة ويقول لا يرحم ولا يسيب رحمه ربنا تنزل مين
انتا انتا لا شى على الاطلاق الا ان يعفو عنك ربك
يبقى يا اخواتى اوعوا تنطقوا الكلمه دى تانى ولو شفتوا حد يقولها انصحوه طيب
تعالوا نشوف حاجة سادسه كدة :برضو تلاقى حد قاعد مع صحبه وفجاه يقول ايه
ده ده عينى الشمال بترف ربنا يستر -- او يقول مثلا انا اصطبحت بوش مين
النهاردة -- او دانتا وشك يقطع الخميره من البيت -- او اول ما حد يدخل
فالنور يروح قاطع فيروح يقول ربنا يستر -- دة يا اخواتى كله اسمه طيره -
يعنى ايه طيره ؟؟ طيره يا اخواتى يعنى تشاؤم هو بيتشاءم اول ما تحصل الحجات
دى -- ودة حرام يا اخواتى لان النبى قال الطيره شرك -- يعنى التشاؤم شرك
فيا اخواتى لازم يكون عندنا تفاؤل النبى كان يعجبه الفال الحسن وكان يكره التشاؤم
فى ناس كمان اول ما تسمع صوت غراب تتشاءم على طول لالادة غلط
مره كان ابن عباس جالس مع ناس فالكروان غرد فقال واحد فيهم خير خيرا فبن
عباس رد على الرجل وقال ليه يا هذا ان ذلك اى صوت الكروان لا يملك خير او
شر
وفى ناس برضو تقول الكروان ما يجى يغرد بيقول الملك لك لك يا صاحب الملك !
جبتها منين دى ؟ هو انتا عرفت منطق الطير ولا ايه ؟ ايوه اكيد بيسبح ربنا
وكل الطيور وكل حاجة ده حتى الجمادات تسبح ربنا ولكن احنا منعرفش بتقول ايه
لان ربنا قال لينا فى القراءن وان من شى الا يسبح بحمد ه ولكن لا تفقهون
يعنى لا تعرفون تسبيحهم
لذلك يا اخواتى محدش يتشاؤم من حاجة -- انتوا عارفين فى سبعين الف هيدخلوا
الجنه من غير ما يتحاسبوا يعنى هيدخلوا على طول ! اول ما الصحابه سئلوا
النبى دة مين دول يا رسول الله الى هيدخلوا الجنة من غير ما يتحاسبوا ؟
اوصفهم لينا يا رسول الله ! فمن ضمن الصفات الى قالها النبى فى الناس دول
انهم كانوا لا يتطيرون يعنى مكانوش يتشاءموا من حاجة
يعنى يا اخواتى اوعوا تتشاءموا من اى حاجة بعد كدة خليكم متفائلين دايما
علشان حتى متتعبوش نفسيا واعرفوا ان كل حاجة تيجى من عند ربنا خير لا يصدر
من الله الشر بيدة الخير تعالوا
يا اخواتى برضو نشوف حاجة سابعة : فى واحد مثلا يقول للتانى يا ملعون --
او الله يلعنك -- او يا كافر -- دة غلط ودة حررررام ! اوعى تقول دانا بهزر
او بهرج مع صاحبى اول ما اقوله يا ملعون ! لا اخى حتى ولو كنت بتهزر دة
حرام ! وكمان اول ما تقول لصاحبك كدة اشد من انك تقتله يعنى الكلمه دى اصعب
من قتله ! مش هتاخد الدليل ؟ اتفضل الدليل اهو قال النبى لعن المؤمن كقتله
-- والنبى ايضا قال ليس المسلم باللعان شفت ازاى الموضوع خطير ؟ انتا تعرف
حتى ولو شفت مسلم عمل حاجة تستحق انك تقوله يا ملعون -- يحرم عليك تقوله
دة ولكن انتا انصحة
ولو شفت حد يعمل عمل من اعمال الكفر اوعى تقوله يا كافر لالا انتا انصحه بس ! طيب
نشوف حاجة ثامنه : تلاقى مثلا واحد يضرب فى واحد فانتا تقوله سيبه حرام
عليك فيرد عليك ويقولك والله لو انطبقت السما على الارض ما انا سايبه وفى
الاكثر مصيبه الى يقولك -- لو ربنا نزلى من السماء مش هسيبوة برضو -- اعوذ
بالله دة اية دة -- اية الضلالة والجبروت دى مين انتا يا متجبر علشان تقول
لو ربنا نزلى من السماء انتا مين انتا لا شى اتق الله فى نفسك واوعى تتلفظ
بالكلام دة تانى ! نشوف
حاجة تاسعة كمان : برضو تلاقى مثلا مدرس عمال يشرح وتلميذ يقوله مش فاهم
حاجة فالمدرس يرد على التلميذ ويقوله ايه انتا طور الله فى برسيمه !
يا اخواتى والله العظيم حرررام الكلمه دى ! انتا عارف ايه معنى طور الله فى
برسيمة .؟؟ معناها ان ربنا معاة طور وطور ربنا دة مش فاهم اى حاجة ! والله
معناها كدة وكمان حرررررام حد يقول لحد يا طور لالا ربنا قال ***منا بنى
ادم ! يعنى اوعى تقول الكلمه دى تانى -- نشوف
حاجة عاشرة واخيره : فى ناس الستات بالذات لما ابنها يقع فى الارض تروح
تقوله اسم النبى حارسك وصاينك ! ده حرررررام - عارفين ليه ؟؟ لانه ربنا بس
الى يحفظ ويصون -- النبى لا يملك لنفسه ضرا ولا نفعاا يعنى النبى ميحفظشى
حد من الحافظ ؟ اللــــــــه بس ربنا قال فى القراءن * فالله خير حافظا وهو
ارحم الرحمين * وربنا قال للنبى فى القراءن قل لا املك لنفسى ضرا ولا نفعا
!
طيب خايفين على الابن من الحسد نقول ايه ؟؟ اقراى المعوذات وقولى ما شاء الله لا حول ولا قوة الا بالله
اخواتى اكتفى بهذا القدر ومع اقوال اخرى تخالف العقيدة فى موضوع اخر
وصلى اللهم على محمد وعلى اله وصحبه اجمعين،،